“هل تقبل الزواج من فتاه تدخن؟”

اكيد استحاله تلاقي صورة  فيها واحد بيدخن ومكتوب هل تقبلى بالتزوج من شاب يدخن ؟!

لكن تلاقي صور من النوع ده كتير: “هل تقبل الزواج من فتاه تدخن؟” !!

وتلاقي التعلقيات بقى على المنوال ده:  دي تبقى فقدت كل انوثتها. واحيانا للاسف تلاقى شتايم واتهامات اخلاقية للبنت اللي ف الصورة!! وانا مش عارفة الحقيقة كل واحد جاب الحق منين انه يحكم على اخلاقيات غيره.

طبعا ف مجتمعنا اللى بينظر بعين واحدة، مجتمع الازدواجيه والتناقض، هتلاقي عادي جدا لما الراجل يدخن ودي حاجه لا تنتقص منه ولا من رجولته شئ بينما لو البنت بتدخن تصبح جريمة شنيعة وتفقدها انوثتها. مع ان التدخين كعادة لا يفرق بين ذكر وانثى بيضر الكل وبيموّت الكل …

وقيس بقى على الكلام ده حاجات كتير مش التدخين بس … لاننا بننظر للغلط بمكيالين. الغلط عند الرجل نقول عليه “عادي” .. وعند البنت ” جريمة” … الشخص المتوازن نفسيا عنده القيم مبتتجزأش. مسمعناش ف قاموسنا عن حاجه اسمها اخلاقيات نسائية واخلاقيات ذكرية .. ولا هتقف قدام ربنا تقوله عادي انا راجل!

 تبــــــا لعقليات متناقضة … اسمع كده ربنا بيقول ايه ” من عمل صالحا من ذكر أو أنثى وهو مؤمن فلنحيينه حياة طيبة ولنجزينهم أجرهم بأحسن ما كانوا يعملون “

 ربنا مقالش ذكر بس .. وحتى فى العقوبات بردو متساويين ” الزانية والزاني فاجلدوا كل واحد منهما مائة جلدة ولا تأخذكم بهما رأفة في دين الله “. للاسف احنا وارثين كم هائل من العاهات والتقاليد لم ينزل الله بها من سلطان ونجعلها مقدسات من حيث لا ندري. ومن اهم مقدساتنا دى ان الذنب عند الرجل روشنة وعند البنت جريمة.

رجاء محدش يفهم من كلامى انى بشجع ان البنت تدخن لانى متأكدة ان ساعات الناس بتفهم الكلام بالشقلوب … كل القضية اللى بتكلم فيها ان المفروض لو شايف ان التدخين ده غلط وعيب يبقى غلط وعيب على البنت والولد ولو شايفه عادى يبقى عادى على البنت والولد. لكن اكيد هوه حاجه سيئه جدااا بالنسبه للاتنين.

 هبـــه احمـــد من مصر

تعليقات (1)

اكتب تعليق


الصعود لأعلى