ابن المرة” مش شتيمة”

احنا الشعب الوحيد اللي” وحياة امك” عنده شتيمة ” وحياة ابوك” عنده طلب.

احنا الشعب الوحيد اللي عنده كلمة ” ابن امك ” دي شتيمة … مع اننا كلنا فعلا ولاد امهاتنا … وايه الغريب في كده !!

احنا الشعب الوحيد اللي لسه بيتكسف من اسم امه. ولا حول ولا قوه الا بالله على العقليات دي.

وايام المظاهرات اللي كانت ضد مرسي، فوجئت لما لقيت بعض المظاهرات بيقولو فيها “احلف بسماها وبترابها… ابن سنيه اللي خربها “. طب وايه دخل سنيه؟! ولا هى بتتقال كتطبيق للتفكير العقيم اللى هوه ان اسم الام ده عيبه مثلا … وللاسف كئننا بنرجع لورا مئات السنين من ايام عنتره لما كانو بيقولولوه يا ابن ذبيبه كئنها شتيمه وهوه فعلا الدم يغلى ف عروقه رد فعل على شتيمتهم!

وكل واحد يتضايق من شخصية معينة يقوم مركب وشه على صورة واحدة ست … ما نبطل بقى التخلف ده! مش عاجبك شخصية انتقدها وخليك محترم … لكن متعمليش فيها الثوري المناضل وانت اصلا محتاج اعاده تربية ومحتاج تثور على نفسك قبل اي حد.

اللى عاوز يشتم حد او يمدح حد ملوش دعوة ده راجل ولا ست.

عاوز تقول لحد انت ندل متقولش” مرة” وعاوز تقوله انت بطل متقولوش” راجل “.

لازم نرفض تشبيه المرأة فى مواقفها البطولية بالرجل، وارفض تشبيه الرجل فى مواقف الندالة بالمرأة.

وكأن الرجل هو رمز البطولة والمرأة رمز الندالة!

المشكله اننا ف مجتمع اتعود ينسب كل الصفات السيئة للمرأة ونقول لما نحب نقلل من الكلام اللى بيتقال ” يا عم ده شغل نسوان ” و ” ده كلام حريم “.

 والولد الصغير لو عيط نقوله ايييه هوه انت بت !!! وكئن كلمه بنت دى شتيمه …

 واعتادنا ننسب اى صفة حلوة للراجل ونقول ” ده فلان ده وقف معايا وقفة رجاله ” يعنى بطل … ولما تقول” ده فلان ده راجل ” يعنى شهم، و”كلام رجاله” يعنى مش هنخلف الكلام.

وللاسف الفكر ده توارثناه كلنا رجالة وستات … يعنى لو كان الرجاله بس همه اللى بيتكلمو كده كنت قلت معلش فى ناس بتتعصب لنوعها. لكن للاسف ان الستات كمان كده تلاقى الام تقول ” انا ابنى راجل ” يعنى انا ابنى جدع وشهم … حتى فى بنات كتير بعد ما يتفقو على حاجه يقولو ” خلاص اتفقنا كلام رجاله “!

انا فوجئت مره ببنت بتقول ” انا لما هتجوز مش هتجوز غير راجل نزل الميدان ايام الثورة مش قعد ف بيتهم زى الست المتطلقة” … وللاسف اللى كاتبه الكلام ده بنت .. يعنى بنت وبتحتقر نوعها!

احنا ولا ومليون سنة حتى على ما نقدر نشيل العفن اللى ملا دماغ المجتمع ده.

مع ان ديننا مبيقولش كده وعمر ما ربنا نسب للرجاله صفات حلو’ ينفردوا بيها لوحدهم دونا عن الستات.

اسمع كده ربنا بيقول ايه ” إن المسلمين والمسلمات والمؤمنين والمؤمنات والقانتين والقانتات والصادقين والصادقات والصابرين والصابرات والخاشعين والخاشعات والمتصدقين والمتصدقات والصائمين والصائمات والحافظين فروجهم والحافظات والذاكرين الله كثيرا والذاكرات أعد الله لهم مغفرة وأجرا عظيما “

انت شايف التأكيد ف ان كل صفة مذكرة تقابلها صفة مؤنثة ربنا مقالش المسلمين والمؤمنين والقانتين ..لا قال ” المسلمين والمسلمات والمؤمنين والمؤمنات…. ” وكل دول ربنا اعد ليهم مغفره واجر … محدش انفرد بالصفات الكويسه ولا حد انفرد بالاجر من ربنا سبحانه وتعالى .

برنسيس هوبا

asar

*الصورة من صفحة ميمي نسوية

اكتب تعليق


الصعود لأعلى