انا مش سيجارة

:انا كتبت الكلام ده عشان المبررين واالبنات اللى مكسوفين يقولوا حصلنا تحرش

انا مش سيجارة

مش زي ما بتقول عليا

مش اخري دوسة ولا هسيبك تهين فيا

ومش كرافته تخنقك بس تخليك محترم

وليه اصلا انا ليه هعرفك لو كنت قليل الاحترام

فكر كده ف عدم وجودي مش هيكونلك انت وجود

بتسب اه ف كل البنات بس امك واختك ملاك

طب ما انا اخت لاخويا ومسيري كمان هبقي أم

يبقي بلاش كلام يضايق ولا حتي قاعدة تعم

طب بلاش كل البنات وخلينا ف امك واختك

اختك مابين مواصلة اوجامعة طهقانه من العيشة

بتتعاكس وتتلمس حتي لو لابسه النقاب

مش قادرة تفتح بقها خايفة من العقاب

امك برده نفس الحكاية مش فارق سنها

ومش هتحس انت بيها ألا لو كنت زيها

بس انت اصلا للأسف مش ضحية لأ مجرم

ياما نفسي اجبلك واحد زيك و يزنقك ف الحيط

هتحس ساعتها بالاهانة وكل بنت عليها بصيت

فى شوية مننا شايفين الحل ف الغطا

فى شوية مننا شايفين الحل ف الغطا

وان لو البنت اتدارت مش هتكون مترمطة

ماشى ينا معاهم للاخر وعايزة اسالهم سؤال

مين اكتر بلد فيها حرمان افغانستان!

عمرك فكرت تحط نفسك مكان بنت فالشارع

حاسة انها فريسة وعمالة ف خطوتها تسارع

لأ و كمان لو حد عاكسها بيجيبوا عليها الغلط

مش محترمة لو رديتي

واحمدى ربنا عاكسك بكلمة ع اساس ده مش غلط

ليه اتحكم ف لبسى عشان حيوان ملوش لازمة

لو السبب فى اللبس بيتحرش بالمنقبة ليه؟

لو كان الفقر السبب صاحب الشركة بيتحرش ليه؟

لو كان سببه الامية معلمي بيتحرش ليه؟

ولو عشان مفيش جواز المتجوز بيتحرش ليه؟

طب ليه السبب جسم وجمال وتروح تتحرش بالاطفال؟

متهيألى دلوقتى اثبتلك على مين الحق

ومين لما يقول انا صح هنقوله لأ

ميام محمود

 

اكتب تعليق


الصعود لأعلى